Les molettes
(Edmond Tanière)

Y’a longtemps, ‘j’ma rapelle, ch’étot l’âme de la région.
Il fallot saquer à l’pelle, dins ches talles ‘ch’carbon.
In étot noier d’sueur, in y mettot tout sin coeur,
In savot qu’cha n’étot pas pour rien, ch’est comme cha qu’in gagnot sin pain.
Pour cha in étot pas tout seul: là haut i’n’avot deux.
Tout à’l’chtiête du chevalet, i n’arrêtotent pas d’tourner.
Quand in l’air, in levot les yeux, in étot tout heureux.
Aujourd’hui in n’vot plus cha, je ne cros plus qu’cha retournera
Is vont bientôt disparaître les molettes.

Y’a Totoche, in vieux mineur, qui vient d’avoir’s’pinsion
Y’a bin’d’maux à sin coeur, qu’i ne peut pu vire’l’fond.
Comme i dit ch’étot l’bon temps. Si j’avos encore vingt ans,
J’apprindros à tous ches jeunes d’à cet’heure, commint tenir un martieau piqueur.
Mais in ravisant in l’air, tout d’un coup i a invie d’braire.
Tous les jours’d’bon matin, de’l’voïette de sin gardin,
Il vayot tourner deux roulette, cha vivot ch’étot bien,
Aujourd’hui cha ne marche plus, ch’est muet comme eune statue.
In va les faire disparaître les molettes.

Mais j’cros bin, qu’ch’est pas fini, ‘l’ carbon ch’est tout note vie
I attint foque après nous, des mollettes, des barrous
‘L’souffrance, ‘l’faim, ‘l’chomage, ça sera bin vite oublié
In rouvrira tous ches moulinaches. In sera fier ‘d’dévaler.
Alors tout in haut des chevalets, les roulettes is’s’mettront à retourner
Ch’est toudis note seul espoir d’armonter un jour tout noir
Avec encore dins s’musette du bon pain d’allouette.
D’l’cage sus qu’au lavabos, in pinsera tous à nos tchiots
In n’veut plus jamais qu’is s’arrêtent, nos molettes

Ch’est toudis note seul espoir d’armonter un jour tout noir
In n’veut pas les vire disparaître nos molettes.

Sommaire d'Edmond Tanière


Accueil     Dictionnaire  Chansons   Livres   Disques   Photos   Liens