D'ù qui sont

D'ù qu'is sont
(Guy Dubois - Simon Colliez)

D'ù qu'is sont toutes ches compagnies éd'mineurs
Qui allotent ed'sous terre faire euch'dur labeur
Au pic, à'l'riv'laine rassaquer euch'carbon
À l'abattache, au hér'ssache, d'ù qu'is sont

D'ù qu'is sont les mineurs du grand saquache
À l'bowette, à l'front ed'talle, à l'accrochache
Méneux éd'quévaux, racommodeux, porion
Nous pères, nous hardis taïons, dis d'ù qu'is sont

D'ù qu'is sont les rires éd'ches files à gaillettes
Oubliant lux peines pour eune amourette
Au moulinache, ouvrant comme ches garchons
Nous lampistes, nous taillettes d'ù qu'is sont

D'ù qu'is sont, is vous d'mind'ront un jour vous gosses
Les souvenirs éd'chez gins, qui allottent à'l'fosse
Pus d'chevalet, pus d'terril et pus d'corons
O vous lamint'rez auchi, d'ù qu'is sont
D'ù qu'is sont toutes ches compagnies éd'mineurs
Porions, galibots, calins ou ingénieurs
Lampistes, files à gaillettes, carrieux d'carbon
Nous terrils, nous mollettes, dis d'ù qu'is sont

D'ù qui sont ches bons jonnes éd'douze à treize ans
Au fond, pousseux éd'barrous aux pieds in sang
Au jour, trieux éd'cailloux et d'bon carbon
Nos vaillants tchiots galibots, dis d'ù qu'is sont

D'ù qu'is sont, les Sainte Barbe et les ducasses
Les fêtes éd'familes, les guinches et les fricasses
Loin eud'ches grêves et d'ches accidints du fond
Eul'tarte à gros bords, les canchons, d'ù qu'is sont

D'ù qu'is sont les vieux corons éd'ches mineurs
D'ù qu'in partageot insemble les bonheurs
L'amitié, i's'trouvot su'l'seuil d'ches maisons
Les bons momints à'ch'pignon, dis d'ù qui sont

Is sont intrés dins léginde ed'no siècle
À'l'fosse nous pères ont soufferts, ont péri
Leur dure misère mérite qu'in les respecte
Conservons leurs chevalets et leurs terrils

Sommaire de Simon Colliez

Accueil Dictionnaire Chansons Livres Disques Photos Liens